معلومات صحية من خلال حوار فكاهى بين أعضاء الجسم

- المخ: إيه يا جدعان الصداع ده مفيش مسكنات ولا ايه ؟
- المعده: لا بلاش أنا بتعب من المسكنات وبعدين أنا علي لحم جداري ومش أكلت من الصبح
- المخ: يعنى مستقبلات الألم تبقى منوره عندى ومشتتانى عن الشغل عشان الهانم بتتعب من المسكنات !!!
- الكلى: بص بصراحه المعده عندها حق
- المخ: شوف الكلى الصرف الصحى كمان بقت تنصحنا
- الكلى: طب خد مسكنات وأنا هخش فى فشل كلوى وشوف بقى هتعمل إيه فى السموم ديه اللى أنا بصرفهالكوا
- الكبد: إستهدى بالله يا كلى واخزى الشيطان ..انا كفايه عليا السموم اللى المعده بتبعتهالى ده بقى جسم يقصر العمر.
- المخ: لا حرام يا جدعان انا شغال من الصبح وجبت أخرى
- القلب: يعنى انت شغال من الصبح وتعبت انا شغال من ساعه ما بدأنا الجسم وعمرى ما اشتكيت.. متبقاش دراما كوين..منا ممكن اقف وشوفوا مين هيوصلكوا الاكل.
- الطحال: مين مزعل القلب يا جدعان..مورنينج عليك يا قلبى
- المخ: ايه الهزار والسكر ده وانا تعبان هنا !
- البنكرياس: حد جاب سيره سكر ؟ 
- المخ: بصوا واضح أن كله همه نفسه..انا هحاول افصل نفسى وأقفل العين عشان الجسم ينام ..معنديش حل تانى 
- الرئه: احنا لسه صاحيين من ساعه..ملحقناش ناخد نفسنا حرفياً
- الشرايين : يا جدعان إستهدوا بالله دي مصارين البطن بتتعارك  مش كده !!  والله أفصل عنكم الإتصال 
- المصاريين : لو سمحت اللي بيتوا من إزاز ميحدفش الناس بالطوب 
- المخ: معلش بقى يا جدعان النهارده يوم اوف..اجازه النهارده ، متخلنيش أتعصب عليكوا 
-القولون : ههه تحب أوريك العصبيه ! الشغلانه لمت والله
-المخ : ربنا يكفينا شرك ، انا هفصل يا جدعان وهشغل لمبه اللاوعى عشان لو حد احتاج حاجه ،
الجسم بينام
- الجلد: الجو حر يا جدعان..وانا سخنت..قومه يا مخ يشغل المروحه
- المخ: متنام بقى هى نقصاك انت كمان...وبطل هرش شويه..مكنتش قرصه ناموسه يعنى أنا روحي بقت في مناخيري  
- الجيوب الأنفيه : كويس إنك إفتتكرت إن ليك مناخير ! تسأل عليها مش كفايه مستحمله انضف الهوا اللي داخل  وأرطبه عشان الجسم ميتعبش 
-المخ : يا ستي هو أنا جيت جمبك ! أنا عاوز انام ربع ساعه  بس حرام عليكم